На првиот ден од стапувањето на сила на мерката за забрана за движење на
населението на подрачјето на општина Прилеп без носење на соодветна
заштитна опрема – маска, шал, марама и слично, Општината денеска
распредели 15.000 бесплатни заштитни маски за граѓаните на Прилеп.
Во акцијата се вклучија и претседателите на урбаните заедници, кои во текот
на денот ќе распределат вкупно 10.000 заштитни маски на домашните адреси
на граѓаните од нивните локални средини.
3.000 заштитни маски му беа донирани на Здружението на пензионери, со цел
заштита од коронавирусот на највозрасната категорија на граѓани, а 500 маски
им беа поделени на Здружението на инвалидски пензионери.
Останатиот дел од вкупно 15.000 заштитни маски кои денеска ги распредели
Општина Прилеп, општинските волонтери ги поделија на граѓани затекнати
пред банките, маркетите, Градскиот пазар и Старата чаршија.
Акцијата на делење бесплатни заштитни маски ќе продолжи и во наредните
денови. Претставниците од неколкуте општествено-одговорни компании кои ги
изработуваат и донираат заштитните маски, информираат дека ќе продолжат
со таквите активности се’ додека од тоа има потреба.
Покрај задолжителното носење заштитна опрема, на граѓаните на општина
Прилеп им се препорачува да го редуцираат излегувањето од своите домови.
Тоа да го прават само од најнеопходни причини, заради одење на своите
работни места, како и излегување од својот дом на само еден член на
семејството, заради купување намирници и лекови од маркетите и аптеките.
