Со забава под маски во ресторанот „Ла Каса Гранде“ и доделување на дипломи и награди на најуспешните заврши 18 –тото издание на карневалот „Прочка 2019“.Градоначалникот Илија Јованоски ги поздрави присутните и учесниците на карневалот, им честита на наградените и посака следната година бројката на учесници да биде поголема а маските покреативни, и ја врачи наградата за децата од здружението „Порака“ со кои беше отворено годинешното дефиле под маски.
Оценувачката комисија во состав: Габриела Шукуроска, Хилда Црнеска, Лилјана Неделкоска, Рубин Белчески и Благоја Атанасоски, и оваа година ја имаа најтешката задача да ги изберат најдобрите маски кои за време на двата фестивалски денови дефилираа низ центарот на Прилеп.
Награда за најдобра маска на детскиот карневал, кои влегуваат во категоријата, учесници до 14 години, доби основното училиште „Блаже Конески“ со „Мадагаскар. Првото место отиде во рацете на основците од „Климент Охридски“ со маската „Пролеп и облачиња“, втора беше маската „Еколошка Пролет“ од училиштето „Добре Јованоски“, а третата награда им беше доделена на основците од „Кочо Рацин“ со „Роденденот на Штрумфета“. Најдобра маска на карневалот „Прочка 2019“ беше групната маска „Водици во Прилеп“ на прилепското здружение „Прочкари“. Во чие изведување учествуваа 30 членови на здружението.
„Како здружение на карневалот сме присутни од самите почетоци од 2006 година, ова ни е втора награда и во 2012 година исто таа добивме награда. Нјмногу ни значат дружењето и пријателствата. Благодарение на добрата организација на карневалот ние имаме пријатели од Лесковац, Шабац, Корча и карневалите низ државава“, истакна Горан Ржаникоски, претседател на здружението „Прочкари“.
Награди се доделени и за најдобри современи и традиционални маски. Во категоријата најдобра традициона маска е маската на учесниците од селото Куратица, Охридско, второто место го освоија гостите од Турција, а третото е за Џаламарите од кавадаречки Сопот.
„Дружењето продолжи во Прилеп и пријателствотот што го стекнавме пред шест, седум години со Прилепчани, би рекол дека прерасна во едно фамилијарно дружење. Денес можеби и очекувавме награда, бидејќи многу се спремавме, но најважно е дружењето, рече Ангелоски Горан претставник на здружението „Св. Василиј“, село Куратица, Охрид.
„Метаморфоза“ , групна маска на учесниците од Лесковац, Србија, на овогодинешното издание на карневалот, е избор за најдобра современа маска. Второто место е за учениците од средното училиште „Ѓорче Петров“ со „Пролетна забава“, а трето место им беше доделено на студиото за танц „Зодијак“ со „Малата сирена“ .
„Нам ова ни е 11 –та година како сме овде и трета или четврта награда, секогаш овде пријатно се чувствуваме. Се гледа еден голем напредок во организацијата на карневалот и се надевам дека ќе се видиме и наредната година. И ние имаме долга традиција на организирање на карневали помеѓу двете Светски војни, и 14 современи карневали но вие повеќе ја негувате традицијата и во секој случај и ние нешто научивме од вас“ рече Мирољуб Радивољевиќ, менаџер на карневалот во Лесковац и член на FECC на Србија.
18 – тиот меѓународен карневал „Прочка 2019“ на кој имаше бројни посетители од земјава и соседството започна во петокот кога беше отворена изложбата на маски, а завршува денес со посен ручек во манастирот „Свети Ѓорѓија“.
