Прилеп денеска беше домаќин на државното изборно првенство во борење за
млади до 20 години. За престижните титули се натпреваруваа 60 учесници од
цела Македонија. Првенството го отвори градоначалникот на Прилеп,Илија
Јованоски. При тоа тој ја истакна поддршката на Општина Прилеп за активниот
спорт.
„Денеска присуствуваме на Државното првенство во борење во младинска
конкуренција. Денееска се натпреваруваат околу 60-тина млади борачи од 15
клубови во државата. Победниците ќе бидат членови на државната
репрезентација во борење и нè претставуваат на европското и светското
првенство во борење. Во оваа прилика сакам да истакнам дека Општина
Прилеп и јас како градоначалник, секогаш сме поддршка на спортот“, рече
градоначалникот Јованоски.
Според организаторите, борењето како спорт напредува и дава видливи
резултати.
„Борењето како спорт напредува со големи чекори. Ние имаме квалитетни
млади борачи во кои треба да вложуваме, а со тоа паралелно, треба да
вложуваме и во соодветен кадар“, истакна Марјан Лазаров, претседател на
судиската комисија.
Членовите на боречкиот клуб „7 Мај- Леов“ од Прилеп се горди што повторно ја
добиваат довербата од Федерацијата на боречки спортови од Македонија, да
бидат домаќини и технички организатори на овој настан.
